Lionel Skaloni je ponovo tu! Selektor Argentine drugi put zaredom stigao je sa Gaučosima do velikog finala Svjetskog prvenstva!
Prije tri i po godine u Kataru Lionel Mesi i drugovi srušili su Francusku boljim izvođenjem jedanaesteraca, a sada će na drugoj strani terena u Njujorku biti moćna Španija, aktuelni prvak Evrope, predvođen Luisom de la Fuenteom, velikim Skalonijevim prijateljem.
“Srećan sam zbog Luisa i fantastičnog niza rezultata koji je napravio sa Španijom”, poručio je kormilar Argentine.
Medije je naravno zanimalo da li će ovo i zvanično biti posljednji ples Lionela Mesija na Svjetskom prvenstvu, a Skaloni je odgovor adresirao na najboljeg fudbalera svijeta.
“Odakle bih ja to znao? Morali biste njega da pitate. Nemam pojma…jer on nikada ne prestaje da zadivljuje. To je pitanje za njega”.
Trebalo je da Argentina i Španija odmjere snage na Finalisimi 27. marta ove godine u Kataru, ali zbog eskalacije ratnih sukoba na Bliskom istoku nije došlo do okršaja vladara planete i aktuelnog prvaka Evrope.
“Jednom smo ih već analizirali jer je trebalo da igramo u martu. Analizirali smo mnoge rivale, ali ni u tome ne treba pretjerati. Uglavnom, znamo kako igraju Špnaci, znamo njihovu snagu i pokušaćemo da ih spriječimo da je iskoriste”.
Skaloni svakako cijeni Špance…
“Imaju igrače koji su na velikoj sceni, vrhunske fudbalere i odlične klubove. Biće to okršaj timova koji će pokušati da se nametnu kroz posjed lopte”.
Lionel Scaloni……..this man’s aura is unmatched🔥🔥🔥#Argentina pic.twitter.com/qaFe302LyJ
— King Hippo (Dhurandhar) (@kingH_offl) July 16, 2026
Osim nespornog kvaliteta, velika snaga Argentine su i navijači.
“Kada vidite svoj narod koliko je srećan, kako slavi – to vas duboko dirne i nemoguće je da ne osjetite to u srcu. Igramo za naš narod, za naše porodice. Za one ljude koji jedva čekaju da vide reprezentaciju. Za ljude koji stoje ispred televizora noseći dres Argentine i navijača River Plejta koji grli navijača Boke juniors. Osjećamo to, cijenimo to…”
Argentina je tokom turnira rasla i još jednom dokazala svoju mentalnu i karakternu snagu. Uspjela je da se vrati iz minusa protiv Egipta, a zatim i u polufinalu sa Engleskom…
“Drugo poluvrijeme protiv Engleske bilo je baš dobro. Generalno smo u posljednjih nekoliko utakmica podigli nivo igre. Naravno, postoje stvari koje bi trebalo poboljšati, ali nadamo se pobjedi u finalu”.
Davno je sada bila ta 2018. godina kada je Skaloni, praktično bez samostalnog trenerskog iskustva, preuzeo kormilo Argentine. Mnogi su sumnjali….A danas? To je trener koji ima titulu prvaka svijet i dvije Kopa Amerike. Ipak, ostaje potpuno skroman.
“Pripremamo se na isti način kao i za svaku utakmicu. Moramo da budemo u najboljem izdanju kako bismo pobijedili. Ne smijemo da dozvolimo da nam uđe u glavu misao da je ovo finale Svjetskog prvenstva jer to može da oteža stvari. Vidjećemo šta će se desiti”, zaključio je selektor Gaučosa.
