Čovjek koji je svoj cijeli životni vijek posvetio Budućnosti napustio nas je juče, ali Podgorica i navijači “Plavo-bijelih” već ističu da ga nikad neće zaboraviti – na jednoj zgradi, u kvartu “Preko Morače”, nacrtan je mural preminulog Milana Rogošića.
“Igrat’ za Budućnost, to je bilo premija”, citirana je izjava Rogošića.
Nakon što je cijelu igračku karijeru proveo u dresu svog voljenog kluba, kasnije je kao trener iznio brojne generacije koje su sa uspjehom nosile dres Budućnosti.
“Sa 17 godina je ušao u prvi tim Budućnosti, posvetio joj se cijeli život, divio joj se, izjavljivao ljubav u svakom trenutku. Na svakom koraku podgoričke kaldrme. A i šire… Ponosno je nosio plavo-bijeli dres i u teškim i u lijepim godinama, nikada nije pomislio da je ostavi, utabao je put zlatnim generacijama našeg kluba, ostavio u amanet godine ponosa i prkosa, anegdote, priče, viteštvo i talenat koji su slijedili mnogi koji su se domogli zvjezdanih visina”, objavila je juče Budućnost.
