Poslije odlaska Lućana Spaletija na kraju prošle sezone šampionsko kormilo Napolija preuzeo je Rudi Garsija – i najblaže rečeno se nije snašao.
Francuz je dobio otkaz, a na njegovo mjesto došao je Valter Macari koji nije uspio mnogo toga da promijeni. Napolitanci su za vikend poraženi od Torina, 3:0, i trenutno su na tek devetom mjestu sa čak 20 bodova zaostatka za vodećim Interom.
Sasvim logično već se u Napulju razmišlja o sljedećoj sezoni i novom treneru. Zbog toga je ponovo aktuelizovana priča o dolasku Antonija Kontea. Italijanski stručnjak, koji je bez angažmana, još u novembru je imao ponudu šampiona Italije, ali do dogovora nije došlo.
Sada je plan da od početka sljedeće sezone preuze klupu Napolija koji će gotovo izvjesno izgubiti status šampiona Italije.
