Sergej Jakirović je 21. avgusta preuzeo Dinamo nakon Igora Bišćana, ali 46-godišnji Mostarac prolazi kroz težak period u glavnom gradu Hrvatske.
Popularni Modri su sinoć na svom Maksimiru poraženi od Viktorije iz Plzenja 0:1 i ostali su na tri boda u grupnoj fazi Lige Konferencija gdje su im osim Čeha, rivali Balkani sa Kosova i kazahstanska Astana.
Mediji u Hrvatskoj ističu da je nekadašnji strateg Maribora, Zrinjskog i Rijeke na ivici ambisa, navijači širom Zagreba, ali i na društvenim mrežama traže ostakvu i žele povratak Nenada Bjelice, međutim Jakirović ne pomišlja na odlazak…
“Ne razmišljam o ostavci. To znači da bih pobjegao. Ne želim i neću to raditi”, rekao je Jakirović.
Dinamo ima tri boda u Ligi Konferencija, savladao je Astanu u Zagrebu 5:1, a izgubio od Balkanija u Prištini 2:0. Izgubili su Modri i u prošlom kolu hrvatskog prvenstva od Gorice u gostima 2:1 gdje je jedan od junaka pobjede domaćina bio naš Nikola Vujnović. Takođe, Jakirović je izašao kao gubitnik i iz velikog derbija sa Hajdukom u Splitu – 1:0. U domaćem šampionatu Dinamo je treći, ali treba istaći da je posljednja dva meča igrao bez povrijeđenog standardnog reprezentativca Hrvatske Bruna Petkovića.
“Ne mogu da vjerujem da nam Bruno toliko nedostaje. On je klasa i saigrače čini boljim”, poručio je Jakirović.
