Mjesecima unazad znalo se da će Tomasu Mileru ovo biti posljednja sezona u dresu Bajerna iz Minhena, a svoju više od dvije decenije dugu misiju među Bavarcima, završio je sinoć nakon meča protiv Pari Sen Žermena.
Nije uspio pobjedom da se oprosti Miler, jer su Svečevi slavili 2:0 u četvrtfinalu Svjetskog klupskog prvenstva, ali to nikako ne može umanjiti veličinu legendarnog Njemca.
“Još sam u radnom režimu. Ne osjećam se drugačije nego prije utakmice kada smo pokušavali, i ja sam pokušavao, da prođemo dalje. Na kraju možda smo zaslužili više. Ali u fudbalu, kada su utakmice ovako tijesne, ponekad je to kao bacanje novčića. I da, izgubili smo”, rekao je Miler nakon meča.
Odlazak fudbalera koji je osvojio 13 Bundesliga sa Bajernom definitivno će se odraziti i na taktičke zamisli Vensana Kompanija u budućnosti, a Miler nije želio da podijeli informaciju gdje će nastaviti karijeru.
Tačnije, kroz medije se spominje MLS liga, ali on to nije potvrdio.
“Naravno da mi je jasno da je ovo bila moja posljednja utakmica, i vidjeću šta će mi sve proći kroz glavu u narednim danima. Trenutno nijesam raspoložen da dijelim dublje misli o svojoj karijeri. Izgubili smo jednu veliku bitku, veoma važnu utakmicu za nas“, govori legendarni veznjak.
