Trener Borca, Saša Ocokoljić, nije krio zadovoljstvo poslije pobjede nad Mornarom u 5. kola ABA lige. Barani su napravili od gotovog veresiju i dopustili Čačanima da odnesu zlata vrijedan tovar iz luke.
>>> MORNAR – BORAC 90:98p.p Đoković i Runjić tragičari, Barani ispustili pobjedu
“Nevjerovatna utakmica. Veliki broj poena, Mornar je imao pobjedu u rukama ali smo na volšeban način uspjeli da izborimo produžetak i iskoristimo bolji psihološki momenat da pobijedimo“, prisjetio se Ocokoljić trojke Valinskasa praktično u poslednjoj sekundi regularnog toka meča za produžetak.
Strateg srpskog kluba je zatim nastavio.
“Iz tabora Mornara su najavljivali ovu utakmicu kao meč sezone, tako da smo očekivali težak posao. Izašli su motivisano, mi smo u prvom poluvremenu iskoristili prednost visokih igrača, dok smo u drugom imali 20 izgubljenih lopti, davali smo Baranima vjetar u leđa. Sigurno da smo mogli bolje da odigramo, ali raduje što nismo odustajali“.
>>> “Bilo je teže izgubiti nego dobiti ovakvu utakmicu”
Čačani su u Bar doputovali sa osmoricom košarkaša, od kojih su šestorica bili dvocifreni.
“Fale nam dva bitna igrača, Čarapić i Furmanavičijus. Junior Pavle Nikolić, mladi Manojlović i Pavićević su ponijeli veliki teret. Veliku prednost smo imali pod košem, ukupno 52 skoka u odnosu na 34 rivala i šest dvocifrenih igrača, kroz 24 asistencije. Napadački smo odigrali kvalitetno ali smo imali veliki broj izgubljenih lopti, 22 primljena poena iz izgubljenih lopti i 12 iz kontranapada protivnika, što je najjače oružje Mornara i čega smo se pribojavali. Na kraju smo ipak ostvarili ono po što smo došli u Bar“, zaključio je Ocokoljić.
SEMAFOR
Petak
Igokea – Cedevita Olimpija 91:78
FMP – Cibona 89:84
Subota
Mornar – Borac Čačak 90:98
Split – Mega u toku
Nedjelja
17.00h Dubai – Spartak
19.00h Zadar – Partizan
21.00h Krka – SC Derbi
Ponedjeljak
19.00h Budućnost – Crvena zvezda
