Muška šahovska reprezentacija Crne Gore pretrpjela je treći poraz na Šahovskoj Olimpijadi u Budimpešti. Bolja od naše ekipe bila je selekcija Turske koja je upisala pobjedu rezultatom 2,5-1,5.
Naši momci mogu žaliti za propuštenim u današnjem duelu, a manjak sportske sreće donio je poraz u duelu sa izuzetnim protivnikom. Naša čelna tabla, Denis Kadrić, još jednom je demonstrirao sjajno poznavanje italijanske odbrane, pa je nakon taktičkog udara u petnaestom potezu stekao značajno bolju poziciju, koju je preciznom igrom pretvorio u čitav poen, njegov peti u osam kola.
Aktuelni šampion države Nikita Petrov dopustio je u jednakoj poziciji da inicijativa pređe na stranu šesnaestogodišnjeg Ediza Gurela, a mladi turski šahista je iskoristio neopreznosti Petrova i upisao pobjedu.
U tom momentu, ostali su da se igraju dueli Nikole Đukića i Luke Draškovića. Đukić je u cajtnotu dozvolio svom protivniku, trinaestogodišnjem čudu od djeteta i velemajstoru Džagiz Kanu Erdogmusu da zauzme prostor, koji je zatim preciznom igrom došao do čitavog poena.
Partija između Draškovića i Emrea Kana nakon velike borbe okončana je remijem, kojim je postavljen konačan rezultat meča.
Naše dame upisale su petu pobjedu na turniru, savladavši ekipu Alžira sa 2,5-1,5. Prvo je okončana partija na trećoj tabli između Aleksandre Milović i Zineb Dine Abdi koje su se saglasile na remi nakon obostrano korektne igre.
Nikolina Koljević je znalački iskoristila prednost stečenu u otvaranju i dovela naš tim u vođstvo, savladavši Raniu Nasr.
Preciznom igrom Aleksandra Žerebecova upisala je svoju šestu pobjedu na turniru, pa je naša ekipa došla do nova dva boda, koja nije spriječio ni poraz Alene Skvorcove na drugoj tabli.
Nakon osam kola, obje naše selekcije imaju po 10 bodova, odnosno po pet pobjeda i tri poraza. Preostala su odigravanja još tri kola, u kojima će naše ekipe tražiti šansu za novim pobjedama.
Nakon osam kolu u vođstvu se u obje konkurencije nalaze reprezentacije Indije, koja ima maksimalan učinak u muškoj konkurenciji, dok je Poljska na diobi prvog mjesta sa Indijom u ženskoj konkurenciji, pa sve izvjesnije djeluje mogućnost da oba pobjednička pehara otputuju u kolijevku drevne igre.
Deveto kolo na programu je sjutra od 15h.
