Sve rukometne oči uprte su u danski Herning.
Grad, iz kojeg dolaze sportski poznati klubovi Midtjiland, epicentar je žrijeba (19.00) za EHF Evropsko prvenstvo, koje se od 15. januara do 1. februara 2026. igra u Danskoj, Švedskoj i Norveškoj.
Titulu brani Francuska.
Crna Gora je osmi put (sedmi uzastopno) među 24 najbolje kontinentalne rukometne zemlje. Lavovi su pod vođstvom legendarnog Didijea Dinara kroz kvalifikacije uspjeli da pronađu onaj prepoznatljiv žar i, posebno remijem u Mađarskoj, pokažu da zaslužuju najveću scenu.
“Momci su shvatili i prihvatili sistem koji je nametnut. Mislim da smo na svim mečevima pokazali svojevrsni dokaz snage“, rekao je nedavno selektor.
Naš nacionalni tim smješten je u trećem šeširu pred žrijeb za EHF Euro. U njemu su i Austrija, Holandija, Češka, Poljska i Sjeverna Makedonija. Bez sumnje, respektatiblno društvo.
U međuvremenu su poznati nosioci grupa. Govorimo o brojnim teškašima svjetskog rukometa. Njemačka je u grupi A, koja će se igrati upravo u Herningu. Takođe, u istom gradu igraće i jedan od tri domaćina, Danska, i to u grupi B. Norveška je u grupi C, a Farska ostrva u grupi D. Obje faze igraju se u Berumu.
Grupa E rezervisana je za drugog domaćina – Švedsku i Malme. Dalje, Kristijanstad će ugostiti grupu F, gdje je već Island…
______________________________________________
GRUPA A / Herning
- Njemačka
GRUPA B / Herning
- Danska
GRUPA C / Berum
- Norveška
GRUPA D / Berum
- Farska ostrva
GRUPA E / Malme
- Švedska
GRUPA F / Kristijanstad
- Island
______________________________________________
Prvi šešir na žrijebu čine Francuska, Danska, Švedska, Norveška, Mađarska i Slovenija. U drugom su Portugal, Norveška, Island, Hrvatska, Španija i Farska ostrva. U pomenutom trećem, uz Crnu Goru, tu su Austrija, Holandija, Češka, Poljska i Sjeverna Makedonija, a u četvrtom Gruzija, Srbija, Švajcarska, Rumunija, Ukrajina i Italija.
Postoji mogućnost da u nekim kalkulacijama dobijemo “balkansku grupu” u vidu Slovenije, Hrvatske, Crne Gore ili Sjeverne Makedonije i Srbije.
“Potrudićemo se da se spremimo što bolje i predstavimo našu zemlju u najljepšem svijetlu. Daćemo kao i uvijek sve za ovaj grb. Obećavamo da ćemo se boriti do kraja“, poručio je prije nekoliko dana Vasilije Kaluđerović.
Svejedno, Crnu Goru na EHF Euru čeka još jedno unikatno iskustvo. Uz određene senatore na parketu i one van njega, ali i mlađe i ornije generacije koje dolaze Lavovi uz granitnu organizaciju itekako mogu da budu nepoželjan suparnik i svojevrsna mina za mnoge.
Tome u prilog idu hvalospjevi iz francuskih medija rukometne velesile, koji su ispratili Dinarov iskorak sa našom reprezentacijom.
“Plasman Crne Gore na EHF Euro 2026. predstavlja fantastičan rezultat i pokazuje da naporan rad i timski pristup donose uspjeh“, između ostalog su pisali vodeći francuski mediji.
U svakom slučaju, drugi dio januara naredne godine prikovaće mnoge za ekrane, dok će se neki možda i otisnuti u Skandinaviju. Uzbuđenja su zagarantovana, a preostalo je da večeras od 19 sati saznamo protiv koga će Crna Gora kovati svoju istoriju.
_______________________________________________
- PRVI ŠEŠIR / Francuska, Danska, Švedska, Njemačka, Mađarska i Slovenija
- DRUGI ŠEŠIR / Portugal, Norveška, Island, Hrvatska, Španija i Farska ostrva
- TREĆI ŠEŠIR / Austrija, Holandija, CRNA GORA, Češka, Poljska i Sjeverna Makedonija
- ČETVRTI ŠEŠIR / Gruzija, Srbija, Švajcarska, Rumunija, Ukrajina i Italija
