Rukometašice Tivta i danas su poražene od Burse u revanš utakmici u drugoj rundi EHF Evropskog Kupa – 38:18. U prvom meču juče bilo je 34:25 za turski tim.
>>> Tivćanke poražene u Turskoj
Podsjećanja radi oba meča su odlukom klubova igrana u Turskoj.
Danas su domaće vrlo brzo riješile pitanje pobjednika. U prvih 10 minuta Bursa se odlijepila na velikih 8:1. Prednost je porasla na dvocifrenu već u 20. minutu kada je bilo 14:4. Pitanje pobjednika bilo je riješeno već na poluvremenu s obzirom da je turska ekipa imala ogromnih 21:9.
Tivćanke jednostavno nisu uspjele da danas odgovore na ritam Burse, pa je vođstvo domaće ekipe postajalo sve ubjedljivije kako je vrijeme odmicalo. Golom Guliz Karaman u posljednjoj sekundi meča Bursa je otišla na najubjedljivijih +20 (38:18).
Kristina Arsenijević je sa pet pogodaka bila najefikasnija u timu Tivta, a ispratila ju je još Božidarka Delibašić koja je dala četiri gola. U strijelce su se upisale još Maša Pavlović (tri gola), Anđela Kovačević, Andrijana Ivanović (po dva gola), Nađa Radičević i Nikolija Medojević (po jedan gol).
Najbolja sa šest golova u pobjedničkoj ekipi bila je Kubranur Sahan.
