Nije ekskurzija u Beogradu prijala vaterpolistima Katara. Doduše, nisu Akademci bili favoriti ni u sinoćnjem duelu 19. kola A1 regionalne lige protiv Starog grada (15:7), a ni večeras protiv Partizana u 20. kolu. Crno-bijeli su potopili crnogorskog predstavnika – 19:9 (4:3, 5:2, 5:3, 5:1).
>>> Kataro nemoćan na gostovanju lideru
Na uvodno vođstvo crno-bijelih (2:0), Kataro je brzo odgovorio i vratio se u egal (2:2). Razliku između dva tima poslije prve četvrtine napravio je gol Koste Bodiroge na dvije sekunde prije isteka uvodnih osam minuta – 4:3.
Ipak, ako je tim Ivana Bjelobrkovića uspio da isparira Partizanu u prvoj četvrtini gol u samom finišu tog dijela meča ih je potpuno slomio. Računajući i taj pogodak sedmostruki šampion Evrope je serijom 4:0 pobjegao na 7:3 i već tada zakoračio ka pobjedi. Prednost od četiri gola domaći su zadržali i na polovini igre (9:5).
Utakmica je već tada bila riješena, a do kraja se postavljalo samo pitanje kojom će razlikom Partizan slaviti. U završnih osam minuta crno-bijeli su ponijeli šest golova viška (14:8).
Na kraju meč je završen i sa najvećih +10 u korist Partizana – 19:9.
Najefikasniji u kotorskom sastavu bio je Dušan Milaš sa četiri gola, dok su ga sa po dva pratili Stefan Vavić i Marko Milić. U strijelce se jednom upisao i Ivan Marković.
Kod Partizana sa četiri pogotka istakao se Miljan Dokanović.
