SEBASTIJAN ALE

Šampion

Nesalomljivi Sebastiajn Ale

Život i fudbal pišu romane.

Sebastijan Roman Tedi Ale pisac je nevjerovatne, inspirativne priče.

Stasiti i snažni, 190 centimetara visoki centarfor, pažnju na sebe skrenuo je igrama u Ajaksu (47 golova u 66 nastupa). Potom je 2022. otišao u Borusiju Dortmund, gdje je doživio šok.

Otkriven mu je kancer testisa, zbog čega je morao bitke sa travnjaka da zamijeni onom najvažnijom – životnom. Operacija, hemoterapije, gubitak kose, mentalna i fizička iscrpljenost… Sve to je prošao junak priče, a u međuvremenu pobijedio i na kopačkama napisao…

“Fuck cancer”.

Vratio se na teren 2023, postigao 11 golova za Borusiju i ostao bez titule u, sada već mitskom, posljednjem kolu Bundeslige. Dovoljno je napisati – Majnc…

Međutim, želja za životom, a time i fudbalom bila je veća od svega. Uz novi imidž i dodatni napredak u svakom segmentu Ale je vrebao priliku za slavu i ugrabio je u svojoj zemlji, na svom kontinentu i u dresu svoje reprezentacije.

Finale Afričkog kupa nacija. Obala Slonovače provukla se kroz iglene uši u nokaut fazu, smijenjen je selektor, legendarni Didije Drogba nikad nije bio zabrinutiji. No, reprezentacija je preko Senegala (putem penala), Malija (u produžecima) i Konga stigla do finala.

Upravo je Ale golom u 65. minutu srušio snove Konga i trasirao put nacionalnom timu do okršaja svih okršaja sa Nigerijom u Abidžanu. Tamo su Orlovi vodili, pa Frenk Kesi poravnao, a onda u 81. minutu dodirom u stilu Zlatana Ibrahimovića glavni lik cijelog bestselera visoko podigao nogu i otvorenom kopačkom poslao loptu u mrežu za pobjedu 2:1 i treću titulu afričkog šampiona u istoriji.

>>> Moralo je da bude tako – Slonovi na afričkom tronu

Ostao je Ale miran čak i tada, ali je po završetku finala briznuo u plač. Jednostavno, sve prethodne godine izgaranja, razočaranja i borbe stale su u taj jedan mitski dodir.

“Toliko smo puta sanjali ovo i ostvarili smo naše snove. Radosne scene u našoj zemlji, osmjesi na licima našeg naroda… Zaista je predivno biti dio toga”, procjedio je 29-godišnji junak i na taj način zaključio filmsko izdanje svoje životno-fudbalske knjige, čije stranice će u budućnosti pomoći svima da prebrode najteže trenutke.

Ale je pokazao da je to moguće.

Jednostavno – šampion.

Upiši se
Obavijesti o
0 komentara
Umetnuti fidbek
Vidi sve komentare