Hoze Molina, Manuel Pablo, Mauro Silva, Sezar, Nuredin Naibet, Žorđe Andrade, Žoan Kapdevilja, Serđo, Fran, Hoze Amaviska, Lionel Skaloni, Đalminja, Juan Karlos Valeron, Albert Luke, Pedro Munitis, Valter Pandiani, Dijego Tristan…
Sjećate se Deportiva La Korunje? Kluba, koji je 2000. pokorio Španiju ispred Reala i Barselone. Kluba, koji je 2004. onaj zvjezdani Milan, jednu od najjačih ekipa u istoriji fudbala, nakon poraza 4:1 na San Siru senzacionalno okrenuo na svom Riazoru 4:0 i igrao polufinale Lige šampiona.
Kluba, koji je potom 2006. pod Goricom pao protiv Budućnosti 2:1 te kroz iglene uši uspio da se provuče u Intertoto kupu.
>>> Noć kad je Budućnost plesala protiv Super Depora
>>> “Diži se, Munitis, babo jedna”: Kako je Brano Milačić viknuo na legendarnog napadača Deportiva
E upravo nekadašnji Super Depor ovih dana slavi i to povratak u – Drugu špansku ligu, a u trećem razredu španskog fudbala igrao je od 2020. godine. Međutim, sada je osvojio prvo mjesto ispred Barselone B, koju je pobijedio u direktnom duelu 1:0.
Junak je postao Lukas Perez, 35-godišnji napadač, koji je rođen u Monelosu, okoloni La Korunje i za nju navija od malih nogu. Ključni trenutak utakmice dogodio se u 57. minutu kada je Perez sjajno pogodio iz slobodnog udarca i, ispostaviće se, pogurao svoj klub do višeg ranga, za oduševljenje 32.000 navijača na tribinama.
Interesantno, Perez igra četvrti put u dres La Korunje, a 2022. je odlučio da se spusti iz Prve u Treću ligu samo zbog svoje prve ljubavi. Sin ribara odrekao se tada 493.000 eura kako bi zaigrao ponovo za svoj Deportivo…
“Rekao sam prijateljima da je 4-godišnjak, koji je igrao u okolini La Korunje, imao san. Došlo je vrijeme da se vratim. Ja nisam zvijezda. Ja sam Lukas, isti onaj iz Monelosa. Nisam došao nikoga da spašavam. Došao sam da pomognem. Ovdje želim da budem i novac me ne pokreće”, rekao je tada Perez.
Ove sezone iskusni napadač postigao je 12 golova, dok je 17 puta asistirao svojim saigračima.
Ugovor mu sa Deportivom ističe 30. juna ove godine, ali je teško očekivati da uprava nakon svega ne produži saradnju sa igraćem koji plavo-bijele boje nosi u srcu od svog rođenja.
